Abdullo Abduhalilov, Mirzo Ulugʻbek nomidagi Oʻzbekiston Milliy universiteti ijtimoiy ish kafedrasi dotsenti vazifasini bajaruvchi. Bungacha Mirzo Ulugʻbek nomidagi Oʻzbekiston Milliy universiteti “Demokratik davlat qurilishi nazariyasi va amaliyoti” kafedrasida katta oʻqituvchi va “Siyosatshunoslik” kafedrasi katta oʻqituvchi lavozimlarida faoliyat yuritgan.

Abdumalik A. Djumanov, Farmatsevtika Texnika universiteti rektori
Abdumalik Jumanov Toshkentdagi Farmatsevtika Texnika universiteti rektori lavozimida ishlab kelmoqda. Shuningdek, Abdumalik Jumanov Toshkentdagi Xalqaro Vestminster universitetida oʻrindoshlik asosida dotsent lavozimida ham faoliyat yuritadi. Bu lavozimlarga tayinlangunga qadar Abdumalik Jumanov Jahon iqtisodiyoti va diplomatiyasi va Toshkentdagi Xalqaro Vestminster universitetlarida rektor lavozimida faoliyat yuritgan. Shuningdek, Abdumalik Jumanov Oʻzbekiston Respublikasi Prezidentining fan, innovatsiya va texnologiyalar boʻyicha bosh davlat maslahatchisi lavozimida faoliyat yuritgan. Abdumalik Jumanov bir qator ishlab chiqarish va oliy taʻlim sohasini rivojlantirishga doir loyihalarda ishtirok etish va ularni boshqarish boʻyicha boy tajribaga ega.

Adrian Chedvik, Britaniya Kengashi
Adrian Chedvik Britaniya Kengashining Istanbuldagi vakolatxonasi Yevropa mintaqasi boʻyicha direktor lavozimida faoliyat yuritadi. U Britaniya Kengashida 30 yildan ortiq xalqaro tajribaga ega. Hozirgi lavozimiga tayinlangunga qadar u 4 yil davomida Britaniya Kengashining Dehlidagi Janubiy Osiyo boʻyicha mintaqaviy direktori lavozimida ishlagan. U, shuningdek, Arab bahori davomida Britaniya Kengashining Yaqin Sharq va Shimoliy Afrika mamlakatlari boʻyicha mintaqaviy direktori lavozimida faoliyat yuritgan, bosh direktorga Global oʻzgarishlar boʻyicha hisobot bergan va Saudiya Arabistoni, Iroq, Gʻarbiy Bolqon, Marokash va Yamanda ishlagan. Adrianning Britaniya Kengashidagi birinchi ishi Britaniya Kengashining Moskvadagi vakolatxonasida boʻlgan, uning faoliyati ikki yil davomida BBC English tomonidan moliyalashtirilgan. Adrian Chedvik taʻlim va madaniyatni targʻib qilishga qoʻshgan ulkan hissasi eʻtirofi sifatida 2006-yilda qirolicha janobi oliyalari tomonidan Britaniya Imperiyasi Ordeni Ofitseri (OBE) unvoni bilan taqdirlangan.

Professor Aleksandra Xyuz, Vestminster universiteti Global hamkorlik va bandlik masalalari boʻyicha sobiq prorektori
Professor Xyuz katta tajribaga ega universitet yetakchilaridan biri hisoblanib, Buyuk Britaniyaning turli oliy taʼlim muassasalarida strategik ustuvor yoʻnalishlar ustida ishlar olib borgan. Vestminster universitetining global hamkorlik va bandlik masalalari boʻyicha prorektori sifatida universitetning xalqarolashtirish faoliyatini boshqargan. Vestminster universitetining global hamkorlikdagi asosiy ustuvor yoʻnalishlari oʻz ichiga xorijiy mamlakatlardan keluvchi talabalar sonini oshirish, universitetda faoliyat yurituvchi talabalar va xodimlar tajribasining xalqarolashuvi va xorijdagi bitiruvchilar bilan yaqindan hamkorlik sanaladi. Professor Xyuz shuningdek, universitetdagi faoliyati davomida talabalar va bitiruvchilar bandligini taʼminlash boʻyicha strategiyalarni ishlab chiqqan va bu strategiyalar markazida talabalarning xoxish-istaklari, imkoniyatlari boʻlgan. Professor Xyuz shu bilan birga universitetning Tenglik, xilma-xillik va inklyuziya (Equality, Diversity and Inclusion) qoʻmitasi raisi lavozimida ham faoliyat yuritgan. Vestminster universitetidagi faoliyatidan oldin Professor Xyuz Kent universitetining tashqi aloqalar boʻyicha prorektori lavozimida ishlab, universitetning xalqarolashuv strategiyasini boshqargan. Uning ilmiy faoliyati asosan talabalarning noakademik tajribalari va bandligiga qaratilgan boʻlib, bu masalalar professorning Birmingem universitetidagi sifat va talabalar masalalari boʻyicha prorektor sifatidagi faoliyati davomida asosiy diqqat markazida boʻlgan.

Alison Jons, Advance HE ijrochi direktori
Alison Jons 2017-yil kuzida Advance HE tashkilotining ijrochi direktori lavozimiga tayinlangan. Bu lavozimga tayinlangunga qadar Yetakchilar Jamgʻarmasining ijrochi direktori sifatida faoliyat yuritgan. U oliy taʼlim tizimida 25 yillik boy tajribaga ega. Advance HE tashkilotiga direktor lavozimiga tayinlangunga qadar Angliya oliy taʼlimni moliyalash kengashi (HEFCE hozirla Office for Students tashkiloti) yetakchilik, boshqaruv va maʼmurchilik siyosatlari boʻlimiga rahbarlik qilgan va ushbu tashkilotda Yetakchilik Jamgʻarmasi va Tenglik boʻlimiga asos solgan. Alison Jons Universitet boshqaruvchilari assotsiatsiyasi sobiq prezidenti boʻlib, Hamdoʻstlik mamlakatlari universitetlari inson resurslarini boshqarish tarmogʻida Buyuk Britaniya vakili sifatida faoliyat yuritadi. Shuningdek, u yaqinda Britaniya Kengashining Going Global, xalqaro oliy taʼlim konferensiyasi rejalashtirish qoʻmitasiga aʼzolikka qabul qilindi. Alison oliy taʼlim masalalari boʻyicha boy xalqaro tajribaga ega, jumladan, Avstraliya hukumati uchun oliy taʼlim muassasalarida oʻquv faoliyatini oʻrganish boʻyicha komissiyaga rahbarlik qilishda ham. Uning bu faoliyati Avstraliya oliy taʼlim sektorida taʼlim sifatini oshirishga qaratilgan oʻqitish va oʻrganish idorasining yaratilishiga turtki boʻlgan. Alison muntazam ravishda xalqaro va mahalliy konferensiyalarda ishtirok etib keladi va universitetlar boshqaruvi, oliy taʼlimda yetakchilik mavzularida chiqishlar qiladi.

Aziza Toʻraxoʻjaeva
Aziza Toʻraxoʻjaeva 2018-yilda Toshkent davlat texnika universitetini tamomlagan. 2019-2020-oʻquv yilida “Nazariy mexanika” fanidan Respublika olimpiadasida, 2021-yilda “Materiallar qarshiligi” fanidan Respublika olimpiadasida 1-oʻrinni egallagan. 2020-yilda u fakultetning “Eng yaxshi talabasi” deb topilgan. Bundan tashqari, 2022-yil 20-may kuni Turkmaniston Respublikasining Ashxobod shahrida oʻtkazilgan “Materiallar qarshiligi” boʻyicha xalqaro olimpiadada 1-oʻrinni qoʻlga kiritgan. Beruniy nomidagi davlat stipendiyasi sohibasi boʻlib, magistraturada tanlovsiz oʻqish huquqiga ega boʻlgan. Bakalavriat bosqichida oʻqish davrida “Alyuminiy qotishmalarining xossalarini takomillashtirish” mavzusida ilmiy tadqiqot ishlari bilan shugʻullangan. Shu mavzuda jami 14 ta ilmiy maqola chop ettirgan, xalqaro va respublika ilmiy anjumanlarida maqolalari bilan qatnashgan. U Britaniya Kengashining “STEMda xotin-qizlar” dasturi stipendiyasiga nomzod boʻlgan.

Baxrom Mirkasimov, Toshkentdagi Xalqaro Vestminster universiteti rektori
Baxrom Ravshanovich Mirkasimov Toshkentdagi Xalqaro Vestminster universiteti bitiruvchi sanaladi. U universitet rektori lavozimiga tayinlangunga qadar mazkur universitetning ilmiy ishlar boʻyicha prorektori, katta oʻqituvchisi lavozimlarida faoliyat yuritgan. TXVU ijroiya qoʻmitasining aʼzosi sifatida universitet ilmiy faoliyatini rivojlantirish ishlariga yetakchilik qilgan. Shuningdek, Baxrom Ravshanovich faoliyati davomida universitetning Londondagi Vestminster universiteti talablari asosida magistratura dasturlari portfoliosini kengaytirish ishlariga boshchilik qilgan. U shuningdek, ilmiy tadqiqot va magistratura masalalari boʻyicha dekan, dekan oʻrinbosari lavozimlarida faoliyat yuritgan.

Devid Karter, Reding universiteti
Devid Karter Reading universitetida transmilliy taʻlim boʻyicha professor va Toshkentdagi Britaniya menejment universiteti Akademik maslahat kengashi aʻzosi sifatida faoliyat yuritadi. Bungacha Devid Karter Reding universiteti xalqaro taʻlim va tillar institutini boshqargan va Xitoyning Nankin shahrida Reding universiteti bilan qoʻshma universitetni tashkil etishda ishtirok etgan.

Deniz Voddingxem, Britaniya Kengashining Oʻzbekistondagi vakolatxonasi direktori
Deniz Voddingxem Osiyo, Yevropa, Afrika va Yaqin Sharq mamlakatlarida 30 yillik xalqaro tajribaga ega. Shuningdek, Britaniya Kengashidagi 18 yillik faoliyati davomida ingliz tili xorijiy til sifatida oʻqituvchisi, taʼlim masalalari boʻyicha direktor, katta oʻqituvchi va boshqa yuqori boshqaruv lavozimlarida faoliyat yuritgan. 2021-yil oktyabrida Britaniya Kengashining Oʻzbekistondagi vakolatxonasi direktori lavozimiga tayinlangunga qadar Britaniya Kengashining Slovakiya, Birma, Nigeriya, Quvayt, Misr, Tunis va Chex Respublikasidagi boʻlimlarida ishlab kelgan. Voddingxem xonim Londondagi Brunel universitetini ingliz adabiyoti va amerikashunoslik ixtisosligi boʻyicha bakalavr darajasi bilan tamomlagan, ingliz tilini xorijiy til sifatida oʻqitish boʻyicha magistr diplomiga ega.

Dildora Solihodjayeva, Oʻzbekiston Respublikasi Oliy taʼlim, fan va innovatsiyalar vazirligi
Dildora Solihodjayeva Oʻzbekiston Respublikasi Oliy taʼlim, fan va innovatsiyalar vazirligida 2019-yildan buyon faoliyat yuritib kelmoqda. Hozirda Dildora Solihodjayeva “Gender va oilaviy zoʻravonlik sabablari va oqibatlari” mavzusida ilmiy faoliyat bilan shugʻullanmoqda. Uning mazkur mavzuga bagʻishlagan maqolalari va ilmiy ishlari xalqaro va mahalliy konferensiya va jurnallarda nashrdan etilgan. Dildora Solihodjayeva “Oliy taʼlim tizimida gender yondashuvi tamoyillarini tadbiq etish” deb nomlangan qoʻllanma muallifi sanaladi. Shuningdek, Dildora Solihodjayeva “Yoshlarni oilaviy hayotga tayyorlash”, “Xotin-qizlarni tazyiq va zoʻravonlikdan himoya qilish hamda gender tenglikni taʻminlash masalalari” kabi fan dasturlari hamda maxsus kurslariga mualliflik qilgan. U 2014-yilda ayol tadbirkorlarni tayyorlash va maktab ayol oʻquvchilarini ish bilan taʼminlash masalalariga bagʻishlangan, Germaniyada 2014-yilda boʻlib oʻtgan trening kurslarida hamda 2017-yil Xitoy Xalq Respublikasida tashkil etilgan “Zoʻravonlik qurbonlarini ijtimoiy va huquqiy qoʻllab-quvvatlashda koʻpqirrali yondashuvlarni tadbiq etish” mavzusidagi maxsus trening kurslarida ishtirok etgan.

Professor Dibyesh Anand, Vestminster universiteti Global hamkorlik va bandlik masalalari boʻyicha prorektori vazifasini vaqtincha bajaruvchi
Dibyesh Anand Global hamkorlik va bandlik masalalari boʻyicha prorektori vazifasini vaqtincha bajaruvchi lavozimida faoliyat yuritadi. Dibyesh Anand universitet professor-oʻqituvchilari tomonidan Xodimlar vakili sifatida saylangan. Dibyesh Anand “Geosiyosiy ekzotika: Tibet Gʻarb tasavvurida” va “Hindistonda hind millatchiligi va qoʻrquv siyosati” nomli monografiyalarga mualliflik qilgan, shuningdek, Tibet, Xitoy-Hindiston chegarasi borasidagi munozara, hind millatchiligi, islamofobiya va Kashmirdagi mojaro kabi mavzularga bagʻishlangan chiqishlar qilgan va nashrlar tayyorlagan. Dibyesh Anand Vestminster qora tanlilar va etnik ozchilik tarmogʻi hamda universitet Tenglik, xilma-xillik va inklyuziya qoʻmitasi raisidir. Dibyesh akademiyadagi boʻlinishlarga qarshi gʻoyalarni ilgari surishda juda faol va hayotning barcha jabhasida tenglik, xilma-xillik va inklyuziya tamoyillarini tadbiq qilish gʻoyasini qoʻllab-quvvatlaydi.

Jerald Lidston, London universiteti
Jerald Lidston London universitetining Goldsmiths qoshidagi Ijodiy va madaniy tadbirkorlik instituti asoschisi va direktori, sanʼat maʼmuriyati va madaniyat siyosati magistatura taʻlim dasturi asoschisi hisoblanadi. U Slovakiyada sanʻat menejmenti taʻlimini yoʻlga qoʻyish boʻyicha Britaniya "Nou-xau" jamgʻarmasining (Buyuk Britaniya Tashqi ishlar vazirligi) toʻrt yillik loyihasiga rahbarlik qilgan. Natijada slovak tilida sanʻat menejmenti boʻyicha birinchi kitob nashr qilingan va keyinchalik Britaniya Kengashining "Muzeyga yaqinroq" loyihasi ishlab chiqilgan. Janob Lidston Britaniya Kengashi va boshqa agentliklar bilan hamkorlikda 20 dan ortiq mamlakatlarda Sanʻat va Madaniyatni menejmenti boʻyicha turli treninglar va kurslar tashkil qilgan. Oʻz faoliyati davomida Jerald Lidston Vetnam Madaniyat, sport va turizm vazirligida Ford Jamgʻarmasi hisobidan faoliyat yuritib Xanoy madaniyat universitetida Sanʻat menejmenti boʻyicha taʻlim dasturini ishlab chiqqan. Bu hamkorlik natijasida bilimlar transferiga va hamkorlik jarayoniga oid asosiy hisobotlar nashr etilgan. Jerald Lidston Angliya Sanʻat Kengashi va Sadler Wells teatri uchun keng koʻlamli raqs loyihalari boʻyicha uchta hisobot tayyorlab bergan. Bular sirasiga Milliy yoshlar raqs kompaniyasi uchun hisobotlar ham kiradi. U shuningdek, Britaniya Kengashi tomonidan Creative Spark loyihalari doirasida Markaziy Osiyo, Oʻzbekiston va Qozogʻiston uchun amalga oshirilgan ikkita besh yillik loyihaga rahbarlik qilgan. Bu oʻz navbatida Buyuk Britaniya parlamenti qoʻmitasining mintaqadagi diplomatiya boʻyicha hisobotlarini tayyorlashga xizmat qilgan.

Gulchehra Rikhsieva, Toshkent Davlat Sharqshunoslik universiteti rektori
Gulchexra Rixsiyeva, 2019-yildan Toshkent davlat sharqshunoslik universiteti rektori lavozimida ishlab kelmoqda. 2019-yilga qadar Toshkent davlat sharqshunoslik universitetining ilmiy ishlar boʻyicha prorektori lavozimida faoliyat yuritgan. Shu bilan birgalikda, Oliy Majlis Senatining Fan, taʻlim va sogʻliqni saqlash masalalari qoʻmitasi raisi oʻrinbosari lavozimida ishlab kelgan. 2006-yilda “Oʻzbekiston Respublikasi Xalq taʻlimi aʻlochisi” medali bilan taqdirlangan. Professor Gulchexra Rixsieva Oʻzbekiston Milliy universitetining filologiya fanlari nomzodi ilmiy darajasiga ega. Gulchehra Rixsieva taʼlim va oʻzbek filologiyasi fanlari boʻyicha katta ilmiy qiziqish va tajribaga ega boʻlib, ushbu sohalarda oʻnlab nashrlar muallifi.

Hikmat Abdurahmonov, TEAM universiteti hammuassisi, HMPARTNERS kompaniyasi hammuassisi, GEN Oʻzbekiston direktori
Hikmat Abdurahmonov Jahon iqtisodiyoti va diplomatiyasi universiteti bitiruvchisi. JIDUda xalqaro iqtisod boʻyicha bakalavr va magistr darajasini olgan. Buyuk Britaniyaning Sent-Endryus universitetida xalqaro biznes boʻyicha magistrlik darajasiga ega bo’lgan. Bu unga biznes olamidagi bilimini optimallashtirish hamda hamkorlari bilan birgalikda lizing, tashqi savdo, kichik va oʻrta biznesga xizmat koʻrsatish kabi sohalarda muvaffaqiyatli kompaniyalarni (HM Partners tarkibiga kiruvchi GroundZero kovorking maydonlari, CLG Leasing/CLGAuto lizing kompaniyalari, MediTech tibbiy asbob-uskunalari kabilari) yoʻlga qoʻyishga yordam berdi. Hikmat Abdurahmonov shuningdek Skolkovo biznes maktabini tamomlagan boʻlib, bundan tashqari, u AQSh, Germaniya, Avstriya, Buyuk Britaniya, Turkiya, Gonkong, Isroil, Singapur, Hindiston va boshqa mamlakatlarda oʻtkazilgan koʻplab yetakchilik kurslari, treninglari ishtirokchisi hamdir. Hikmat Abdurahmonov 50 ta davlatda tadbirkorlik, biznes taʻlimi, biznes va menejmentda yetakchilik sohalarida keng bilim va tajribaga ega. Hozirda u mamlakatdagi boshqa yetakchi tadbirkorlar bilan birgalikda Oʻzbekistonda birinchi tadbirkorlik universiteti boʻlmish TEAM universitetini tashkil etgan. Bu raqamli innovatsiyalar, xalqaro biznes, koʻngil ochish sanoati kabi yoʻnalishlarda bakalavr dasturlarini taqdim etadi. TEAM universiteti Buyuk Britaniyaning LSBU universiteti bilan yaqindan hamkorlik qiladi. TEAM Universiteti oʻz biznesini, startapini yoʻlga qoʻymoqchi boʻlgan, tadbirkorlik koʻnikmalari va global fikrlash qobiliyatiga ega boʻlgan 300 ga yaqin talabalarga taʻlim beruvchi yosh xalqaro universitetdir. Universitet xodimlari va professor-oʻrituvchilari dunyoning turli mamlakatlaridan tashrif buyurgan mutaxassislar sanaladi.

Inoyatilla Neʼmatov
Oliy taʼlim, fan va innovatsiyalar vazirligi taʼlim sifatini nazorat qilish boshqarmasi boshligʻi Inoyatilla Neʼmatov 1999-yilda Andijon muhandislik iqtisodiyoti institutini marketing ixtisosligi boʻyicha tamomlagan. 2022-yilda Oliy maʼlumotli kadrlar tayyorlash tizimini rivojlantirishning marketing strategiyasi (Oʻzbekiston Respublikasi misolida) mavzusidagi ilmiy ishini yoqlab falsafa fanlari doktori ilmiy darajasiga ega boʻlgan. Inoyatilla Ubaydullayevich vazirlikdagi faoliyati davomida Oʻzbekiston Respublikasi oliy taʼlim muassasalarida taʼlim sifatini ta’minlash va takomillashtirish tizimini isloh qilish boʻyicha bir qator loyihalarni amalga oshirib kelmoqda. Shuninglek, Inoyatilla Neʼmatov Oʻzbekiston Respublikasi oliy taʼlim tizimini isloh qilish va rivojlantirishning huquqiy-meʼyoriy asoslarini ishlab chiqishga doir ishlarda faol ishtirok etib kelmoqda. Oʻz faoliyati davomida Inoyatilla Ubaydullayevich Germaniyaning GIZ, Jahon Banki, Erasmus kabi xalqaro tashkilotlarning loyihalarida turli vazifalarni bajarib kelmoqda.

Jamilya Gulyamova, direktor oʻrinbosari, Britaniya Kengashining Oʻzbekistondagi vakolatxonasi
Jamilya Gulyamova Britaniya Kengashidagi faoliyatini 2001-yilda boshlagan. Ushbu lavozimga tayinlangunga qadar u Oʻzbekiston davlat xorijiy tillar instituti (hozirgi Oʻzbekiston Davlat Jahon tillari universiteti)da Ingliz tili kafedrasi mudiri va Oʻzbekiston Respublikasi Bank va moliya akademiyasida katta oʻqituvchi lavozimlarida faoliyat yuritgan. 1996-yilda Jamilya Gulyamova Oʻzbekiston Ingliz tili oʻqituvchilari assotsiatsiyasiga asos soladi va 2001-yilga qadar ushbu tashkilot prezidenti vazifasini bajaradi. Jamilya Gulyamova turli xalqaro va mahalliy miqyosdagi keng koʻlamli, kompleks loyihalarni, jumladan, oliy taʻlim sifatini taʻminlash, taʻlim dasturlari islohoti, taʻlimda yetakchilik, ingliz tili taʻlimi standartlarini xalqarolashtirish va sanʻat va madaniyat sohalarida taʻlim masalalariga bagʻishlangan loyihalarni boshqarish va ularga yetakchilik qilish boʻyicha 20 yillik tajribaga ega. Jamilya Gulyamova lingvistika boʻyicha falsafa doktori ilmiy darajasiga va Buyuk Britaniya universitetlarining onlayn taʻlim, monitoring va baholash boʻyicha xalqaro tan olingan sertifikatlariga ega. U faoliyati davomida til taʻlimi va rivojlanish, kasbiy mahoratni uzluksiz rivojlantirish, taʻlim sohasini isloh qilish va sifatni taʻminlash kabi mavzularga bagʻishlangan, nufuzli xalqaro jurnallarda chop etilgan maqolalarga mualliflik qilgan. U, shuningdek, turli nufuzli konferensiyalar, xususan, IATEFL, TESOL USA va Going Global singari xalqaro konferensiyalarda oʻz taqdimotlari bilan muntazam ishtirok etib keladi.

Juli Till, Global biznesni rivojlantirish boʻlimi rahbari, QAA
Juli Tillning QAA dagi vazifalari xalqaro universitetlar, davlat organlari va nazorat qiluvchi idoralar bilan hamkorlik qilishni oʻz ichiga oladi. Hozirgi kungacha boʻlgan faoliyati davomida Juli Till QAAning xalqaro akkreditatsiya xizmatlarini, oliy taʻlim provayderlari uchun xalqaro aʻzolikni va butun dunyo boʻylab bir qator maxsus konsalting va trening loyihalarini ishlab chiqqan va amalga oshirgan. U, shuningdek, QAAning taʻlim sifatiga masʻul mutaxassislar uchun yillik xalqaro trening dasturlarini boshqaradi. Juli jamoasi Angliyadagi oliy taʻlim provayderlari uchun yangi xizmatlarni ishga tushirishda, shu jumladan sifatni takomillashtirishning ixtiyoriy tekshiruvlari va akademik daraja berish vakolatiga ega boʻlishni istagan provayderlarni qoʻllab-quvvatlash va maslahatlar berishda ishtirok etadi. Juli Till Sharq va Afrika tadqiqotlari maktabida (SOAS, London universiteti) rivojlanish tadqiqotlari boʻyicha magistr darajasiga, Manchester universitetida MBA darajasiga ega boʻlgan hamda Prince2 amaliyotchisi hisoblanadi. QAAga ishga kelishdan oldin Juli Oksford Universiteti nashriyotida Yaqin Sharq, Shimoliy Afrika va Markaziy Osiyo boʻlimi boshligʻi sifatida faoliyat yuritib, taʻlim vazirliklari uchun savodxonlik va til taʻlimi boʻyicha yechimlarni ishlab chiqishda va mintaqa uchun yetakchi taʻlimiy materiallarni moslashtirish bilan shugʻullangan.

Komiljon Karimov, Oʻzbekiston Respublikasi Oliy taʼlim, fan va innovatsiyalar vaziririning birinchi oʻrinbosari
Oʻz faoliyati davomida Komiljon Karimov Toshkentdagi Xalqaro Vestminster universiteti, Jahon iqtisodiyoti va diplomatiyasi universitetida rektor lavozimida, BMTning YUNESKO singari tashkilot va agentliklarida taʼlim va sogʻliqni saqlash sohalarini rivojlantirishga oid yuqori lavozimlarda faoliyat yuritgan. Komiljon Hamidovich Jahon iqtisodiyoti va diplomatiyasi universitetida siyosiy fanlar va xalqaro munosabatlar yoʻnalishi boʻyicha nomzodlik dissertatsiyasini yoqlagan. Janob Karimov, shuningdek, Oʻzbekiston Respublikasi tashqi ishlar vazirligi hamda Oʻzbekistonning horijiy mamlakatlardagi diplomatik missiyalarida yuqori lavozimlarda faoliyat yuritgan. Komiljon Karimovning ilmiy faoliyati davlat boshqaruvi, rivojlanish va xalqaro taʼlim masalalariga bagʻishlangan boʻlib, ushbu yoʻnalishlar boʻyicha 10 dan ortiq ilmiy ishlarga mualliflik qilgan.

Lachin Italmazova, Markaziy Osiyo boʻyicha hududiy direktor, Times Higher Education
Lachin Italmazova dunyoning turli burchaklarida faoliyat yurituvchi universitetlar bilan hamkorlikda ishlash boʻyicha 10 yildan ortiq tajribaga ega. Oʻtgan 5 yil davomida Lachin Italmazova Times Higher Education (THE) jamoasi bilan birga ishlab kelmoqda va global taʼlim hamda xalqaro rivojlanish masalalariga juda katta qiziqishga ega. Markaziy Osiyo boʻyicha hududiy direktor sifatida oliy taʼlim muassasalariga oʻz reputatsiyalarini yaxshilash va boshqarish boʻyicha, xorijiy talabalarni jalb qilish va akademiklarni ishga yollash boʻyicha koʻmak berib kelmoqda.

Meddelin Ansel, Britaniya Kengashi, Taʻlim masalalari boʻyicha direktor
Meddelin Ansel xonim Kembridj universiteti Emmanuel kollejini klassika yoʻnalishi boʻyicha tamomlagan. Keyinchalik Ansel xonim Chester universiteti yuridik kollejida huquqshunoslik boʻyicha diplom kursini hamda amaliy huquqshunoslik kurslarini tamomlagach, Freshfilds Brukxaus Deringer va keyinchalik AQShning Sallivan va Kromvel huquqshunoslik kompaniyalarida ish faoliyatini olib brogan. Olti yildan soʻng hukumat idoralarida faoliyat yurita boshlagan. Meddelin Ansel davlat va hukumat idoralarida bir qancha lavozimlarda, jumladan, Bosh Vazir ijro apparati, Buyuk Britaniya ichki ishlar vazirligi huzuridagi davlat chegaralarini boshqarish xizmati (Home Office), Innovatsiyalar, Universitetlar va Koʻnikmalar hamda Biznes, Innovatsiya va Koʻnikmalar departamentlarida faoliyat yuritgan. U Innovatsiyalar, Universitet va Koʻnikmalar boyicha davlat kotibi Jon Denam huzuridagi Koʻnikmalar Strategiyasi va Kommunikatsiyalar boʻlimi direktori oʻrinbosari sifatida ishlagan. Shu davr mobaynida Ansel xonim Lord Mendelson rahbarligida sanoat boʻyicha davlat strategiyasini ishlab chiqishda faol ishtirok etadi. U shuningdek, Lord Uillets uchun 2011 Oliy taʻlim boʻyicha strategik hisobotni tayyorlaydi va keyninchalik Xalqaro bilim va Innovatsiya boʻlimiga rahbarlik qila boshlaydi. Bu boʻlimda Ansel xonim Xalqaro taʻlim strategiyasini ishlab chiqishga yetakchilik qilib 375 million funtlik Nyuton Jamgʻarmasi asos solinishiga bosh-qosh boʻladi. Keyinchalik Meddelin 4 yil davomida Universitetlar Alliansida ijrochi direktor lavozimda faoliyat yuritadi. Ansel xonim 2018-yil noyabr oyidan Britaniya Kengashida Taʻlim masalalari boʻyicha direktor lavozimida ishlab kelmoqda.

Nilgun Yalchin Felxner, Britaniya Kengashning Yevropa hududida Oliy taʼlim va hamkorlik xabi direktori
Nilgun Yalchin xonim hozirda Britaniya Kengashning Yevropa hududida Oliy taʼlim va hamkorlik xabini boshqarib kelmoqda. Xab hozirda oʻz ichiga 44 ta mamtakatni birlashtiradi. Nilgun Yalchin xonimning mazkur lavozimdagi vazifasi boshqa mamlakatlarning Buyuk Britaniya bilan oliy taʼlim sohasidagi hamkorligini kuchaytirish masalalarini tadqiq qilish sanaladi. Nilgun Yalchin Istanbul texnika universitetida dengiz meʼmorchiligi va muhandisligi ixtisosligi boʻyicha bakalavr darajasiga ega boʻlgan va Istanbul Galatasaray universitetida biznes boshqaruvi ixtisosligi boʻyicha magistraturani tamomlagan. Xususiy sektordagi faoliyatidan soʻng, Nilgun Yalchin 16 yil muqaddam Britaniya Kengashidagi faoliyatini boshlagan. Hozirgi lavozimiga tayinlangunga qadar Britaniya Kengashining Turkiyadagi vakolatxonasida turli boshqaruv lavozimlarida faoliyat yuritgan.

Nishat Riaz, Oliy taʼlim tizimlari va xalqarolashtirish boʻlimi boshligʻi, Transmilliy oliy taʼlim, Britaniya Kengashi
Doktor Nishat Riaz taʼlim boshqaruvi boʻyicha 20 yillik tajribaga ega. U sogʻliqni saqlash, gender masalalari, koʻnikmalarni rivojlantirish, madaniyat va taʼlim sohalariga oid keng koʻlamli dasturlarni boshqargan va yetakchilik qilgan. Nishat Pokistonning Gilgit-Baltistan provinsiyasidagi birinchi universitet – Karakurum Xalqaro universitetining asoschilaridani biri sanaladi. Nishat turli xalqaro rivojlanish tashkilotlarining boshqaruv va maslahat kengashlarida 17 yildan ortiq tajribaga ega. Hozirda Nishat Britaniya Kengashi huzuridagi transmilliy oliy taʼlim boʻlimi yetakchisi hamda oliy taʼlim tizimlari va xalqarolashtirish boʻlimi global boshligʻi lavozimida faoliyat yuritib kelmoqda. Bu lavozimga tayinlangunga qadar u Britaniya Kengashining dunyo boʻylab eng katta taʼlimiy loyihalaridan biri hisoblangan tashkilotning Pokistondagi taʼlim sohasidagi faoliyatini boshqargan. Nishat oʻz faoliyati davomida katta koʻlamdagi taʼlimiy dasturlarni ishlab chiqish va amalga oshirishga koʻmak bergan va turli xalqaro tashkilotlari, shu jumladan, Birlashgan Qirollikning QAA tashkiloti xalqaro maslahat kengashi aʼzosi hisoblanadi. Taʼlim sohasiga qoʻshgan ulka hissasi uchun Nishat 2017-yilda Birlashgan Qirollik qirolichasi janobi oliyalari tomonidan Britaniya Imperiyasi Aʼzosi (MBE) faxriy unvoni bilan taqdirlangan.

Professor Piter Bonfild, OBE (Britaniya Imperiyasi Ordeni Ofitseri), Vestminster universiteti rektori va prezidenti
Professor Piter Bonfild Vestminster universiteti rektori va prezidenti sifatida universitetning barcha sohalardagi faoliyati va rivojlanishini, universitet xodimlari va talabalarining farovonligi, sogʻligi va havfsizligini taʼminlash, tenglik va inklyuziyaga qaratilgan holda boshqaradi. Professor Bonfild shuningdek, universitetning Office for Students (OfS) dagi vakili sifatida qonun bilan belgilangan hisobot majburiyatlarini bajaradi. U shuningdek, universitet ijroiya qoʻmitasi bilan birgalikda talabalar uchun yuqori sifatli taʼlim imkoniyatlarini taqdim etish, fan, taʼlim va ishlab chiqarish sohasi bilan yaqindan hamkorlikni taʼminlash ishlarini olib boradi. Professor Bonfild universitet rektori lavozimiga tayinlangunga qadar 2019-2020-yillarda dunyo boʻylab 170.000 nafardan ziyod professional aʼzolariga ega Muhandislik va texnologiya instituti vasiylik kengashi raisi va prezidenti sifatida faoliyat yuritgan. Shuningdek, hozirda professor Bonfild Londondagi 39 ta oliy taʼlim muassasasini birlashtiruvchi London Higher tashkiloti raisi oʻrinbosari hisoblanadi. U shu bilan birga mazkur tashkilotda oʻzi asos solgan, talabalar va universitet xodimlarining ruhiy salomatligini taʼminlashga qaratilgan Sogʻliq, xavfsizlik va farovonlik tarmogʻiga raislik qilib kelmoqda. Professor Bonfild sogʻlom jamiyatni barpo etishda jismoniy faollikning tutgan oʻrnini targʻib qiluvchi UK Active tashkilotining direktori hisoblanadi. 2021-yil fevralidan eʼtiboran professor Bonfild Mehnatni muhofaza qilish va xavfsizlik instituti vasiylik kengashi raisi lavozimiga tayinlangan. Professor Bonfild bir qator hukumat tashkilotlarida ekspert sifatida ishlab, toʻrtta mustaqil ekspertizaga raislik qilgan. 2006 yidan 2012-yilga qadar Piter Bonfild Olimpiya oʻyinlariga tayyorgarlik ishlari boʻyicha qoʻmita aʼzosi sifatida barqarorlik strategiyasini ishlab chiqqan va tadbiq etgan. U quruvchilik sohasida ilmiy tadqiqot va innovatsiya rivojiga qoʻshgan hissasi uchun 2012-yilda qirolicha janobi oliyalari tomonidan Britaniya Imperiyasi Ordeni Ofitseri (OBE) unvoni bilan taqdirlangan. Professor Bonfild bir qator nufuzli tashkilotlar a’zosi va toʻrtta universitetning faxriy professori hisoblanadi. Professor Bonfild milliy velopoyga chempioni boʻlgan va 2004-yil Afina olimpiya oʻyinlarida triatlon boʻyicha ayollar komandasiga murabbiylik qilgan.

Saurav Dev Bxatta, Jahon Banki Global taʻlim amaliyotlari bosh Iqtisodchisi
Saurav Dev Bxatta hozirgi vaqtda Jahon Bankining Markaziy Osiyo mamlakatlaridagi tahliliy, maslahat va kredit operatsiyalariga yetakchilik qilmoqda. Ushbu lavozimga tayinlangunga qadar Saurav Dev Bxatta Jahon Bankining Sharqiy Osiyo va Tinch okeani hamda Janubiy Osiyo mamlakatlari, xususan, Myanma, Kamboja, Mikroneziya federativ shtatlari, Bangladesh, Nepal, Shri Lanka va Maldiv orollari regionida faoliyat yuritgan. Uning faoliyati taʼlim sektorining turli darajalari, jumladan, erta yosh taʼlimi, umumiy taʼlim, texnik va kasbiy taʼlim (TVET) va oliy taʼlim sohalari bilan bogʻliq boʻlgan. Saurav Dev Bxatta shaharlarni rejalashtirish sohasi boʻyicha Kornel universiteti falsafa doktori (PhD) ilmiy darajasiga ega va Masachusets texnologiyalar institutida elektr muhandisligi va informatika ixtisosligi boʻyicha magistratura bosqichida taxsil olgan.

Stiven Uollis, Transmilliy taʼlim direktori/Katta akademik koordinator, Vestminster universiteti
Stiven Uollis Vestminster universitetidagi faoliyatini 2018-yil fevralida katta akademik koordinator sifatida, Vestminster universitetining Toshkentdagi Xalqaro Vestminster universiteti oʻrtasidagi hamkorligini boshqarishga maʼsul lavozimdan boshlagan va keyinchalik transmilliy taʼlim boʻyicha mudir va direktor lavozimiga tayinlangan. Stiven Uollisning strategik vazifalaridan biri universitetning barcha transmilliy hamkorlik aloqalarini boshqarish sanaladi. U shuningdek universitet ijroiya kengashiga mavjud hamkorlik aloqalarini kuchaytirish va yangilarini yoʻlga qoʻyish boʻyicha maslahatchi ham sanaladi. Stiven shu bilan birga universitetning global mobillik faoliyati, jumladan, Turing va universitet xalqaro hamkorlik tarmogʻini boshqarishga masʼul. Stven oliy taʼlim sohasida 20 yillik tajribaga ega va oʻz faoliyati davomida turli boshqaruv lavozimlarida ishlab kelmoqda, xususan, DeMontfort universiteti xalqaro aloqalar boʻyicha direktori, Kent universiteti xalqaro aloqalar boʻyicha direktori vazifasini bajaruvchi lavozimlarida ishlagan. U shunindek, bir necha yillar davomida Chivning saralash qoʻmitasida baholovchi sifatida faoliyat yuritgan. Stiven Uollis Buyuk Britaniyaning Reding universitetida qadimgi tarix ixtisosligi boʻyicha bakalavr va qadimgi ijtimoiy va madaniy tarix boʻyicha magistr darajasiga ega boʻlgan.

Tatyana An
Tatyana An, Oʻzbekistonda taʻlim sohasida tajribaga ega mutaxassis. Oʻzbekiston Milliy universitetining “Amaliy matematika va axborot texnologiyalari” yoʻnalishida magistratura bosqichini tamomlagan. U EPAM global IT-kompaniyasida faoliyat yuritib turli malaka darajasidagi IT mutaxassislari uchun taʻlim dasturlarini ishga tushirishda ishtirok etadi. Shuningdek, u IT Park universitetida (ITPU) qabul boʻlimi boshligʻi sifatida ham faoliyat yutirgan. Oʻz tajribasida u nufuzli, yirik “Prezident maktablari” loyihasida uch yil davomida ishlab ushbu loyihada ariza va hujjatlarni topshirish tizimining talab darajasida yoʻlga qoʻyilganligini kafolatlash boʻlgan. U Britaniya Kengashining “STEMda xotin-qizlar” dasturi stipendiyasi sohibasi hisoblanadi.

Tullio Lobetti, QAA (Buyuk Britaniya Sifatni kafolatlash agentligi)
Doktor Tullio Lobetti 2003-yilda Turin universitetining xorijiy tillar va adabiyotlar fakultetini Sharqiy Osiyo falsafasi va dinlari ixtisosligi boʻyicha tamomlagan. Keyinchalik 2004-yilda Sharq va Afrika tadqiqotlari maktabida (SOAS, London universiteti) Yapon dinlari boʻyicha magistrlik darajasiga ega boʻlgan. 2011-yilda mazkur universitetda dinshunoslik boʻyicha PhD darajasiga ega boʻlgan. 2021-yilda London Universitet kollejida (UCL) Oliy taʼlimni boshqarish boʻyicha MBA darajasiga ega boʻlgan. Doktor Tullio Lobetti 2008-yildan 2014-yilga qadar SOASda katta oʻqituvchi lavozimida, soʻngra 2022-yilgacha Ismoiliyshunoslik institutida sifatni taʻminlash boʻlimi boshligʻi lavozimida faoliyat yuritgan. 2022-yilda u Oliy taʻlim sifatini taʻminlash agentligida (QAA) taʻlim sifati boʻyicha mutaxassis sifatida ish boshlagan va butun dunyo boʻylab sifatni taʻminlash va yaxshilash boʻyicha bir qator loyihalar, shu jumladan Vetnam, BAA va Nigeriyadagi loyihalarga rahbarlik qilgan.

Viki Stot, QAA (Buyuk Britaniya Sifatni kafolatlash agentligi) ijrochi direktori
Viki Stot QAA tashkiloti ijrochi direktori lavozimida 2 yildan buyon faoliyat yuritib kelmoqda. Shu davr mobaynida Viki Stot tashkilotning Birlashgan Qirollik toʻrtta hududidagi faoliyatini yanada rivojlantirishga katta hissa qoʻshdi. Viki Stot taʼlim sifatini taʼminlash, takomillashtirish va boshqarish, butun hayot davomida ilm olish tamoyillarini tadbiq qilish, yollanma ravishda yozma ishlarni tayyorlab berishni jinoyat sifatida tan olinishiga oid qonunchilikni ishlab chiqish va pandemiya holatlarida taʼlimni samarali yoʻlga qoʻyishda hokimiyat idoralari vakillari, taʼlim siyosatini yurituvchi organlarga konsultatsiyalar berib keladi. U jahon miqyosida Buyuk Britaniya oliy taʼlimini himoya qiladi, jumladan Oliy taʼlim sifatini taʼminlash agentliklari xalqaro tarmogʻi (INQAAHE) boshqaruv kengashi aʼzosi sifatida. QAAga kelishdan oldin Viki Oksforddagi Sent-Xyu kollejida boshqaruvchi (COO) lavozimida, Birmingem universitetida strategik rejalashtirish boʻyicha direktor va Uorvik universiteti va Uorvik biznes maktabida turli lavozimlarda faoliyat yuritgan. Viki Manchester universiteti va Garvard Kennedi biznes maktabini tamomlagan va Nazorat qiluvchi organlarning strategik boshqaruvi boʻyicha malakaga ega.

Viren Lall, King biznes kolleji adyunkt professori va ta’lim masalalari bo‘yicha xalqaro ekspert
Viren Lall tashkilotlarni transformatsiya qilish bo‘yicha mutaxassis, menejment bo‘yicha adyunkt professor hamda ta’lim masalalari bo‘yicha xalqaro ekspert sanaladi. U hozirda King biznes kollejida professor lavozimi hamda oliy ta’lim sohasini rivojlantiruvchi xizmatlarni taqdim etuvchi ChangeSchool tashkiloti boshqaruv direktori lavozimlarida faoliyat yuritmoqda.
Boshqaruv ta’limi bo‘yicha Viren korporativ va davlat tashkilotlari bilan ishlash tajribasiga ega. U o‘z faoliyati davomida Buyuk Britaniya hukumatining GREAT dasturi bo‘yicha Fors ko‘rfazi hamkorlik kengashi tashkilotiga a’zo 5 ta mamlakatda hamda Nyuton jamg‘armasi tomonidan moliyalashtirilgan “Innovatsiya yetakchilari” dasturi bo‘yicha 17 ta mamlakatda trening kurslarini taqdim etgan.
U, shuningdek, ETF (Ta’lim va trening fondi) tomonidan taqdim etiluvchi “T-Level Leadership” dasturi yetakchi treneri hisoblanadi. U trenerlik faoliyati davomida shaxsiy samaradorlik hamda yetakchilik qobiliyatlarini rivojlantirishda mustaqil qarorlar qabul qilish, xulosalar yasash, motivatsiya, xulq-atvor o‘zgarishi, samarali muzokaralar, maqsadlarni belgilash, hissiy intellekt kabi mavzularga doir treninglar tashkil qilgan. U tashkilot xulq-atvori va o‘zgarish masalalari bo‘yicha bir qator biznes maktablarida va boshqaruv ta’limi kurslarida, xususan, London biznes maktabi va King biznes maktabida mashg‘ulotlar olib borgan. U shuningdek, tez o‘suvchi kompaniyalar uchun trenerlik va mentorlik xizmatlarini taklif qilgan, jumladan, Buyuk Britaniyaning #HelpToGrow dasturi orqali.
Uning masterklaslari va trening dasturlari onlayn tarzda Fors ko‘rfazi hamkorlik kengashi tashkilotiga a’zo 6 ta mamlakat (Ummon, Qatar, Baxreyn, Saudiya Arabistoni, Quvayt va BAA)da; Markaziy Osiyo mamlakatlari (O‘zbekiston va Qirg‘iziston)da, Lotin Amerikasi mamlakatlari (Peru, Kolumbiya, Meksika, Braziliya)da hamda Janubiy va Janubiy-sharqiy Osiyo mamlakatlari (Hindiston, Tayland, Malayziya, Indoneziya)da ingliz tilida taqdim etilgan.
U London biznesmaktabiningi biznes boshqaruv bo‘yicha magistraturasini, London Qirollik kollejining magistratura kurslarini tamomlagan. Uning “Multi-lokatsiyali murakkab o‘zgarishlar va yetakchilik talablari” sarlavhasi ostidagi keys maqolasi “Kogan Page” mustaqil matbuot kompaniyasi tomonidan nashr etiluvchi “Organisational Change Explained 2018” to‘plamida nashr etilgan.